TACLOBAN CITY – Imbis nga pagkaurusa ngan kalipayan iton mahinanabo ha pagsalin-urog hiton kapyestahan ha Sagkahan, Syudad han Tacloban, nagkamayada lugod away nga nagresulta hiton pambuno ngan pagkamatay. Nahinabo an insidente ha Brgy. 63 Manga han Sagkahan alas 9:30 kagab-i, Oktubre 24, 2017.
Ginkilala an biktima nga hi Jason Teraza, aada na ha sakto nga pangidaron, empleyado hiton gobyerno, ngan residente ha Brgy. 63 Manga, Sagkahan han Tacloban.
Ginkilala naman an mga suspek nga hira Edmar Macasil, waray asawa, waray trabaho ngan hi Levy Ausa, 37 anyos, may asawa, usa nga construction worker ngan residente naman ha nasabi nga lugar.
Subay hiton inisyal nga imbistigasyon han Tacloban City Police Office station 1, nagdedebate an biktima ngan mga suspek, nagresulta hiton away ngan gamit iton kutsilyo ginbubligan pagbuno hi Teraza, naangkon niya an upat nga buno ha parte han iya lawas nga dayon naman niya iginkamatay.
Sumala kan TCPO station 1 commander PCInsp. Alex Echon, nakabantay ngan nagririnubing-rubing an mga kapulisan para hiton seguridad ha Sagkahan pero waray gud kalilikayi ini nga insidente.
“Mayada kita prevention nga ginhimo para waray insidente nga mahinabo, mayada kita patrolling ngan holding han aton mobile so diri gud naton malilikyan baga nasugad hini.”
Arestado man dayon an mga suspek nga nagbuhat hini nga krimen ngan ha pagka yana in paslak na ha TCPO station 1 lock up cell ngan matapos ngani an ginbubuhat nga imbistigasyon plano pasakahan han an mga ini hin murder o di ngani homicide.
