Davao City- Gihagit sa Eastern Mindanao Command (Eastmincom) ang Kaparatan Southern Mindanao Region nga isang-at sa korte ang kaso ugali dunay kapasikaran ang alegasyon nga militar ang anaa sa likod sa kamatayon ni Bernardo Clarion kinsa sakop sa Sulong Kultura (SUKUL).
Gidasig ni Eastmincom Spokesperson Major Ezra Balagtey ang Kaparatan-SMR nga ipasaka sa korte ang kaso aron masuta kung tinuod ba o dili nga sundalo ang nagpatay kang Clarion kinsa nakita nga wala na’y kinabuhi sa Barangay Callawa niadtong adlaw’ng Biyernes.
Nagsumikad ang hagit ni Balagtey sa pagkundina ni Kaparatan SMR Secretary General Jay Apiag sa kamatayon ni Clarion ug gipahid sa kasundaluhan sanglit aktibo ang biktima sa mga rally sa dakbayan.
Ang akusasyon ni Apiag hugot gilimod sa tigpamaba sa Eastmincom sanglit wala na kini matinga pa kay sukad kaniadto hangtud karon ang mga walhon dali ra makapasangil sa kasundaluhan panahon dunay mapatay nga militante.
Ang Buhangin PNP walay igong kasayuran sa gisabwag nga taho ni Apiag sanglit walay nadawat ang kapulisan nga dunay patay’ng lawas nakaplagan sa nasangpit nga lugar.
Apan nasayran nga si Clarion usa ka sakop sa SPARU Unit sa NPA ug gituuhang usa sa mga suspek sa pagpusil patay sa Intel Officer sa Baguio PNP ug nasayran nga mu-surrender na unta sa otoridad apan sumala pa gituuhang gipusil patay kini sa iya ra usab mga kauban sa kalihukan.
RadyoMaN Joel Viray
