Davao City – Walay angay kahadlokan sanglit luwas kaonon ang mga ginabaligya nga karne sa baboy dinhi sa syudad sa Davao.
Kini mao ang gipaniguro sa Davao City Veterinarian’s Office diin matud sa OIC niini nga si Dr. Cerelyn Pinili nga gipailawom sa tukmang inspeksyon ang mga baboy nga ginabyahe ug ginahikay sa mga slaughter houses.
Saysay ni Pinili nga ginarequire ang matasg hog owners og shipping permit ug health certificate ayha kini makasulod sa Davao aron mapaniguro nga wala nagbaton og bisan unsang sakit ang mga baboy.
Segun sa opisyal sa City Vet nga kung buot gayud maniguro ang mga Dabawenyo, mamahimong sutaon sa mga konsumante ang Meat Inspection Certificate nga gikan kanila diin kini makita na nagbitay sa matag stall sa karnehan o bin ba kaha sa meat section sa mga malls.
Dugang niini, gipaniguro sa City Vet nga nagpadayon ang ilang hugot nga pagmonitor sa pagkaylap sa ASF ilabi na sa Brgy. Lamanan ug Domingga sa Calinan Districts lakip sa kasikbit nga mga lugar.
Nanawagan usab kini sa partisipasyon sa publiko kung dunay mamonitor nga kadudahang mga baboy sa ilang mga barangay.
RadyoMaN Jason Amisola
