Karsada sa New Bataan nga naguba sa linog, gisirado sa motorista

Davao City – Gikumpirma sa New Bataan Municipal Disaster Risk Reduction and Management Office (MDRRMO) nga walay casualty o apektadong indibidwal sa pagkaguba sa portion sa national highway sa New Bataan, Davao de Oro asa miigo ang magnitude 5.2 nga linog alas 04:43 sa kaadlawon, Marso 6, 2023.

Sa interbyu sa DXDC RMN Davao kang Lynne Dollolasa, MDRRMO Officer sa Local Government Unit (LGU) New Bataan, gisulti niini nga gimando na sa Provincial DRRMO ang temporaryong pagsirado sa Shadol road o agianan gikan New Bataan padulong Maragusan, Davao de Oro, bisan og usa lang ka lane ang apektado tungod kay dili kini luwas gamiton sa mga motorista.

Matud ni Dollolasa, niadtong Pebrero 1, 2023 sa dihang miigo ang magnitude 6.0 nga linog sa Davao de Oro, nakitaan na og liki ang maong karsada. Sa pagkakaron, giabisohan ang mga motorista nga mugamit og alternatibong dalan.

“Naa man ‘tay other road nga kadto gyong main road nga national road pud sya – from Nabunturan nga muagi sa Barangay Magangit, Barangay Camanlangan ug sa (Barangay) Tandawan leading to Barangays of Maragusan,” sulti sa MDRRMO official.

Samtang, wala usab naapektuhan ang mga eskwelahan sa New Bataan sa kusog nga linog. Nasayrang nagpatuman og suspensyon sa klase kagahapong adlawa tungod sa insidente.

RadyoMaN Kirby Manzon