Zamboanga City-Ta imbestiga aura el Housing Division del Govierno Local , sobre el bendida del maga units baho na Zamboanga Road Map to Recovery o Z3R na Barangay de Sta.Barbara despues tiene ta aparece na Social Media como el Facebook que ta bende con maga units donde ya man post cuneste na Zamboanga House and Lot for Sale .
Asegun na post del un Netizen que el Housing Unit tiene complete documento na cantidad de 450 mil de pesos cada unit .
Cuando ya llega este na atensyon del Hefe del Housing Division Jawo Jimenez , e le ya asegura que ay actua le cuneste klase de asunto , y hinde este debe socede kay el maga kaserias o Housing units ya llebanta usando el pondo de Govierno National entendido para con aquellos maga pamilya quien ya sale afectao del 2013 September Siege aqui na ciudad de Zamboanga cuando ya ataka el Rebelde Moro National Liberation Front o MNLF que ya afecta con mas de veinte mil maga pamilya o mas de ciento mil individual .
Si Jimenez ya habla que hinde tolera el Govierno que bende estos conel unit siendo hinde este puede bende kay ta prohibit en este klase de actuacion .
Ay llama tambien segun conel atensyon del netizen quien yan post conel unit na social media .-Melanie Guanzon
