Kasabutan nga magbalik sa mga basurang natambak sa Tagoloan, Misamis Oriental, gipirmahan na sa South Korean Government

27

Nipirma na sa kasabutan ang South Korean government ug Philippine Government nga ibalik sa ilang nasud ang 5,177 tons nga mga basura sa Verde Soko Philippines nga nakatambak sa Sitio Santa Cruz, Tagoloan, Misamis Oriental.

 

Kini gihimo niadtong Hunyo 13, sulod sa opisina sa Mindanao International Container Terminal MICT sa lungsod sa Tagoloan.


 

Lakip sa mga nipirma sa maong kasabutan silang Young De Jong ang Director for Environment sa South Korea, MICT Chief Customs Collector John Simon, Misamis Oriental Board member Gerardo Sabal nga maoy representante ni Misamis Oriental Governor Bambi Emano, Congresswoman Juliette Uy sa 2nd district sa Misamis Oriental ug uban pang mga opisyal sa gobyerno.

 

Ang nanguna sa maong Joint Meeting mao si Cagayan  de Oro District Collector Floro Calixian.

 

Matud ni Board Member Sabal nga nasabutan sa South Korean Government ug mga opisyal sa Custom ug Misamis Oriental nga ibalik ang 5,177 tons nga mga basura sa Verde  Soko.

 

Nisugot ang South Korea sa maong kasabutan ug nisaad nga sila ang motubag sa 17.5 million pesos nga maoy gastuhon sa transportasyon sa mga basura.

 

Nakatakdang ibalik ang mga basura sa South Korea nga dili pa moabot ang June 30 karong tuiga.

 

Sa kasamtanganh, gihuman lang ang pag repack sa maong basura nga nakatambak sa Sitio Santa Cruz, Tagoloan, Misamis Oriental.

 

Samtang, bisan nga mabalik sa South Korea ang maong mga basura magpasaka og kaso ang Bureau of Customs batok sa mga opsiyal sa Verde Soko.

Facebook Comments

From Advertisers