Davao City – Atol sa pagpahigayon sa DXDC RMN Davao sa Kasamang Yano 2018, mitambong ang Philippine Drug Enforcement Agency (PDEA-XI) kinsa mihatag og diskurso ngadto sa mga estudyante sa University of Southeastern Philippines (USEP-Mintal) campus kabahin sa iligal nga droga ug ang di’ maayong epekto niini sa usa ka tawo.
Kini subay sa tema sa maong aktibidad nga ‘Kabatan-onan Ilikay sa Droga Isports Pakusgan ta’ sugod karong adlawa, Abril 23 hangtod 24.
Gipasabot ni PDEA-XI spokesperson Noli Dimaandal nga usa sa epekto sa paggamit og iligal nga droga mao ang hallucination.
Dugang niini, gipahinumdoman ni Dimaandal ang mga bawal aron malikay sa paglapas sa RA 9165 kun Comprehensive Dangerous Drugs Act of 2002 sama sa pagpamaligya, paggamit, pagdala-dala ug ang pagtanum niini.
Gani sumala ni Dexter Niel Guden, estudyante sa USEP kinsa nakapaminaw sa maong diskurso, dako kining tabang alang kaniya ug sa uban pang estudyante sa maong tunghaan ilabi na nga daghan sila’g nailhan nga mga bag-ong klase sa droga ug unsa ang mga di maayong epekto niini sa kalawasan.
RadyoMaN Jason Amisola
