Roxas City, Capiz- Lauman nga mapasiga na sa maabot nga adlaw sang Sabado, Hulyo 7 2018 ang island barangay sang Olotayan.
Ini bangod nga natapos na ang pagpahamtang sang ikaduha kag ikatatlo nga submarine cable nga nagakonektar halin sa Agojo, Panay patabok sa amo nga isla.
Ang nasambitan nga proyekto ang ginpondohan sang masobra P60-milyones pesos sang Aquino administration sa idalom sang Barangay Line Enhancement Program(BLEP) nga programa sang Department of Energy.
Sa madumdoman, una na nga ginpatigayon ang ground-breaking ceremony para sa amo nga proyekto sang nakaligad nga Marso 14, 2016.
Samtang aminado naman si CAPELCO General Manager Eng. Edgar Diaz nga na-delay ang amo nga proyekto bangod man sa pila ka mga procurement procedures nga kinahanglan nila sundon labi pa nga nag-angkon sang problema sa kontrata matapos nga makatatlo ka beses ini nag-agi sa bidding process.
Bangod sa pagkonektar sang supply sang kuryente, ginasigahom nga magaganyat ini sang mga dugang nga mga oportunidad sa pagnegosyo kag turismo sa Roxas City kag probinsya sang Capiz.
