TACLOBAN CITY – Diri la gihapon matuod-tuod para hadton mga kasangkayan ngan mga kaklase han nabiktima han landslide ha Tacloban nga hi Zoe Hernandez, 17 anyos ngan residente ha Brgy. 43-B Quarry District han Tacloban.
Usa na hiya nga patay nga lawas matapos ma-retrieved han mga otoridad ha landslide site, alas 11 han aga kanina.
Iginpa-agi han mga kasangkayan hini an ira kasubo ha social media, sumala han post ni Stephanie Villanueva, makuri nga bumaya ha usa nga sangkay nga pirmi happy kun iya nakikit-an.
Ha post naman ni Joy Ann Adonis, masakit para ha iya nga huna-hunaon nga waray na an iya sangkay.
Nasusubo gihapon an Leyte National High School kun diin naeskwela hi Zoe, ha post ha social media, nanhihingarag an Supreme Student Government han mao nga eskwelahan ha pagkamatay ni Zoe. Usa hiya nga representative han grade 12 ha SSG.
Mas masakit naman para han uyab hini nga hi Joshua Tismo, sumala ha iya, unfair an kalibutan ha pagkawara han iya girlfriend.
An nanay naman ni Zoe Hernandez nga hi Zerjean Amancio in padayon pa nga ginbibiling han mga otoridad ngan usa pa nga biktima.
Mababaruan nga nahinabo an landslide dida han sabado han gab-i.
