Kaso batok suspek sa hit and run ipasaka inig malubong na ang biktima

Davao City- Kasong reckless imprudence resulting to Homicide, Physical Injury and Damage to property through regular filing ang ipasaka sa City Prosecutor’s Office batok sa hit and run suspek nga giilang si Jester Yucosing nga drayber ni Boston, Davao Oriental Vice Mayor John Paul Lampig.

Sa interbyu sa DXDC RMN Davao kang Police Major Dexter Domingo, DCPO-Traffic Enforcement Unit chief, gikatakdang sa Lunes Pebrero 6, 2023 pa nila mapasang-at ang kaso sa piskalya.

Gibutyag ni Domingo, nidesisyon ang complainants kinsa mga ginikanan sa biktima nga si Ana Mae Talili nga unahon usa nila’g asikaso ang pagpalubong sa biktima karong Pebrero 4, 2023.

Sa AFP PNP Press Conference gibutyag ni Police Major and lawyer Eudisan Gultiano, ang drayber boluntaryong ni-surrender pinaagi kang Vice Mayor Lampig sa DCPO Traffic Enforcement Unit.

Gibutyag ni Gultiano nga ni-execute og extra judicial confession ang drayber sa presensya sa iyahang abogado.

Tungod regular filing human nga ni-surrender ang suspek irelease ang maong drayber samtang magpaabot sa warrant of arrest nga ipakanaog sa korte.

Samtang, gibutyag ni Gultiano ihatag ang P500,000 nga ganti gikan kay FPRRD ngadto sa usa ka witness nga nahimong susi sa pag-ila sa suspek.

Sumala ni Gultiano, una pa man kini nitahan sa iyahang kaugalingon na-identipika na ang maong suspek sa PNP pinaagi sa nipatim-aw nga saksi.

Kahinumduman, pasado alas 12:00 sa kadlawon sa Tulip Drive, Matina niadtong Enero 26,2023 niresulta sa kamatayon sa biktima ang nahitabong hit and run diin ang nakabangga mao ang Toyota Hilux-Conquest nga adunay plate number nga MV-file no. 1101-1026468 nga gidrayban ni Yucosing ug nakarehistro sa pangalan sa bise mayor.

RadyoMaN Aimee Guinita