Tiniyak ng Philippine National Police (PNP) na lilitisin nang may transparency at alinsunod sa due process ang kaso ng isang pulis na nanghihikayat ng pag-aaklas sa gobyerno matapos maaresto si dating Pangulong Rodrigo Duterte.
Ayon kay PNP PIO Chief PCol. Randulf Tuaño, naka-angkla rito ang integridad at pagiging neutral ng PNP.
Matatandaang si Patrolman Francis Steve Tallion Fontillas ay nag-trending makaraang mag-live sa kanyang Facebook account na nanghihikayat sa kapwa nito mga pulis na mag-alsa sa pamahalaan at tumutol sa pag-aresto kay dating Pangulong Duterte.
Sinabi ni Tuaño, ang kaso laban sa naturang pulis ay bunsod ng hindi awtorisado at may bahid-politikang mga social media post kaugnay ng mga ulat tungkol sa pag-aresto sa dating pangulo ng bansa.
Samantala, sinabi naman ni PNP Chief PGen. Rommel Marbil na ang social media ay hindi isang plataporma para sa personal o pampolitikang agenda.
