Davao City – Giatras sa mga ginikanan ang ilang reklamo batok sa suspek nga nangmolestya sa ilang 9 anyos nga anak nga lalaki.
Nakagawas sa prisohan niadtong Lunes ang suspek nga si Renmark Kevin Empic, 21 anyos, construction worker ug taga-Brgy. Malabog Paquibato District, Davao City.
Sa interbyu sa DXDC Davao kang SASA PNP WCPD officer PO2 Laila Vencer naluoy ang mga ginikanan ngadto sa suspetsado kinsa ila ra usab higala.
Kahinumduman nga gireklamo ang suspek kinsa hubog atong tungura human nga iyang gidulaan ang pribadong parte sa lawas sa menor de edad gawas sa usa ka tindahan sa Doña P. Ramos Brgy. Aliongto, Lanang, Davao City.
Sa kasuko usab sa batang lalaki nipauli kini sa ilang balay ug nikuha og kutsilyo aron manimalos sa suspetsado.
Apan napugngan kini sa iyang inahan ug nagpatabang na sila sa kapulisan aron ipadakop ang suspek.
Matud ni Vencer dili usab garantiya nga nakagawas na ang suspek karon gawasnon na kining muhimo na usab og laing salaod.
Padayon gihapon ang ilang paghatag og proteksyon sa mga kabataan sama sa 9 anyos nga lalaki kinsa biktima sa pagpangabuso.
RadyoMaN Aimee Guinita
