Kaso sa suspek sa pagpatay sa dalagita sa Bansalan, posibleng madugangan

Davao City – Bisan magkinaunsa, dili makig-areglo ang pamilya sa dalagita nga nakaplagan nalang nga wala nay kinabuhi sulod sa abandonadong balay sa Poblacion Uno, Bansalan, Davao del Sur nga napalgan niadtong July 15, 2024.

Sa interview sa DXDC RMN Davao kang Maricel Ramil, inahan sa 15 anyos nga biktimang si alyas Mimi, iyang gisulti nga subay sa giingon kaniya sa pulis, gawas sa murder, posibleng mag-atubang og kasong rape ang suspect kung mugawas na ang medical examination ug kung positibong nahilabtan sa suspect ang biktima. Samtang, posible matud pang kasohan og trespassing ang suspek sa tag-iya sa abandonadong balay.

“Sakit gyud kaayo ang iyang gibuhat sa akong anak. Ma-imagine nako giunsa niya akong anak. Nagpatong-patong man na iyang kaso, upat man gyud na kabuok, dili gyud pud ko magpa-areglo. Mag-antos siya sa iyang (gibuhat),” saysay sa inahan.

Ginapaabot nalang sab sa DXDC RMN Davao ang impormasyon gikan sa Bansalan Municipal Police Station (MPS) kung unsa ang uban pang kaso nga atubangon sa suspetsado.

RadyoMaN Kirby Manzon