Nadugangan sang 35 ang mga COVID-19 cases sa Negros Occidental samtang 25 naman sa ciudad sang Bacolod subong nga Biyernes, Hulyo 24, 2020.
Yari ang breakdown sang mga kaso sa probinsya suno sa Department of Health Western Visayas Center for Health Development Case Bulletin No. 120:
Bago City – 3
Cadiz City – 6
Calatrava – 1
Don Salvador Benedicto – 1
EB Magalona – 2
Escalante City – 3
Himamaylan City – 1
Hinigaran – 1
Hinoba-an – 1
Ilog – 1
Kabankalan City – 2
Manapla – 1
Murcia – 2
Pontevedra – 1
Pulupandan – 1
Sagay City – 1
San Carlos City – 1
Sipalay City – 1
Talisay City – 1
Toboso – 1
Valladolid – 1
Victorias City – 2
Ang mga kaso sa probinsya ang lunsay halin sa locally stranded individuals (LSI) samtang sa 25 ka kaso subong nga adlaw sa Bacolod, isa lang ang overseas Filipino workers (OFW) kag ang nabilin ang indi man LSI kag indi man OFW.
Matandaan nga gin-report kaina sang udto sang Bacolod City Health Office ang 13 ka mga bag-o nga kaso sang COVID-19 positive sa Purok Mahimulaton, Barangay Banago.
Ini sila ang mga close contact sang isa ka pasyente nga nagpositibo sa virus apang nagtaliwan nakaligad nga semana. Sa karon gin-lockdown na ang lugar.
Gin-lockdown man sang otoridad ang 80 ka mga panimalay sa Purok Seaside, Barangay Tangub, ciudad sang Bacolod matapos nagpositibo ang pamilya sang isa ka COVID-19 patient sa lugar nga isa ka empleyado sang General Services Office sang ciudad.
Dugang pa sang DOH 6, 66 sa kabilugan ang mga kaso sa rehiyon kon sa diin nagsaka na sa 960 ang total confirmed COVID-19 cases.
Sa sini nga numero 374 ang active cases, 570 (24 new) ang naka-recover kag nagapabilin naman sa 16 ang napatay bangud sa virus.
