Naglab-ot na sa 2,453 ang kaso sang dengue kag 12 diri ang napatay sa probinsya sang Iloilo humalin Enero 1 tubtub Hunyo 1, 2019 nga record sang Iloilo Provincial Health Office.
Nagtaas ini sang 597% ikumparar sang nakaligad nga tuig sa amo man nga period nga may yara lamang sang 352 ka kaso sang dengue.
Bangud sini, nagtalana si Governor Arthur Defensor sang sinapol sa mga Alkalde sang kabanwahanan kag sa ila mga Municipal Health Officer agud hambalan ang nagataas nga problema sa dengue.
pagahiwaton ang nasambit nga sinapol sa Hunyo 10 sa Provincial Capitol.
Suno sa gobernador nga dapat liwat-liwaton ang pagpahanumdum sa mga pumuluyo ang mga pamaagi sa paglikaw sa dengue agud mapunggan ang padayon nga pagtaas sini sa probinsya sang Iloilo.
Samtang ginpahayag naman ni IPHO head Dr. Patricia Grace Trabado nga ginapatuman karon sa mga district hospitals ang “fast lane”para sa may mga dengue nga wala sang ginasukot nga balayran sa mga pasyente.
Liwat man nga ginpahanumdum ni Trabado ang pag-obserbar sang 4-S sa pagtapna sang mga lamok nga nagadala sang dengue.
