Gi-dismiss sa City Prosecutor’s office ang kasong Frustrated Murder nga gipasaka ni Police Lt. col. Michael John Deloso batok nilang  SPO1 Ian Quitoriano ug PO1 Elmer Arabe Jr. pinasikad sa Resolution sa City fiscal nga gipakanoog ug gipirmahan niadtong June 11, 2019.
Ang maong resolution gipirmahan ni Deputy City Prosecutor ug officer-In-charge Charisse Galarita-Bitoon.
Mahinumdoman, nga ang maong kaso nagsugod dihang si Deloso gi-ambush samtang nag-drive sa iyang service vehicle duol sa Misamis Oriental Capitol ug si SPO1 Quitoriano ug PO1 Arabe Jr., ang gitudlo ug gi-akosahan ni Deloso nga maoy nag-ambush kaniya niadtong November 20, 2018.
Nasayran nga silang Quitoriano ug Arabe parehong na-assigned sa Regional Drug Enforcement Unit sa Camp Alagar, samtang si Deloso ang na-assigned sa Police Regional Office sa Northern Mindanao.
Samtang, gibutyag ni Deloso nga niadtong panahona gikan siya sa Northern Mindanao Medical Center kon NMMC kay nangayog kwarta sa iyang asawa nga usa ka doctor ug gikan sa NMMC misakay kini sa iyang color puti nga Van aron mo-adto sa opisina sa iyang abogado nga si Atty. Dale Bryan Mordeno.
Apan wala kini makadayon sa opisina sa iyang legal counsel human matud pa gi-ambush sa duha ka suspek.
Basi sa unom ka pahinang resolution sa city fiscal, kombinsido ang panel ug prosecutor nga walay igong ebidensya si Deloso sa iyang mga pasangil batok sa duha ka polis.
