Kasong kriminal posibleng atubangon sa ginikanang magdumili sa pagsustento sa ilang mga anak

Davao City – Muatubang sa kasong kriminal ang usa ka ginikanan kinsa mapamatud-ang wala o nagdumili sa pagtunol og suportang pinansyal sa ilahang mga anak ilawom sa economic abuse ug sila posibleng makulong sulod sa pipila ka bulan ug katuigan lakip na ang pagbayad og fines depende sa gibug-aton sa grounds.

Sa interview sa DXDC RMN Davao kang Atty. Joana Paola Garado atol Serbisyong Straight to the Point ni RadyoMaN Renz Barbarona, gibutyag niya nga ilawom sa balaod sa Family Code of the Philippines, obligado ang ginikanan nga musustento sa mga anak sa ilahang galastuhon matag adlaw sama sa komportableng pinuy-anan, sinina, pagkaon, medical assistance, edukasyon ug uban pa.

Apan, iyang gipaklaro nga ang kantidad sa i-demand nga financial assistance dapat angay ug igo ra sab sa kapasidad ug pangita sa ginikanan.

Sa katapusan, pahinumdom ni Garado nga tulubagon sa inahan ug amahan nga suportahan ang ilahang mga anak kasado, dili o bulag man tungod katungod sa mga bata nga makadawat og suportang pinansyal alang sa ilang pang adlaw-adlaw nga panginahanglan hangtod sa higayon nga makahuman na sila og eskwela.

RadyoMaN Ivy Parido