Labangan, zamboanga del Sur – Isip pagpartisipar sa dungan nga pagsaulog sa ika-121 nga paghandum sa National Flag Day, ang kasundaluhan sa 1st Infantry (TABAK) Division miduyog sa pagpasidungog sa bandera sa nasud.
Ang National Flag Day nagsugod kagahapong adlawa hangtud na sa Hunyo 12 kon diin handumon usab ang Independence Day.
Gisugdan kini sa may alas 7:30 ang takna sa buntag kagahapong adlawa didto mismo sa TABAK Grandstand, Kuta Sang-an, Upper Pulacan, Labangan, Zamboanga del Sur.
Ang paghandum gisugdan pinaagi sa pagkanta sa nasudnong awit inubanan sa pagtaas ug pagsaludar sa bandera sa nasud sa tanang mga Tabak troopers kauban si 1st Infantry Division ug Joint Task Force ZAMPELAN Commander Roberto T. Ancan ug sa mga empleyadong sibilyan isip pagpasidungog niini.
Mahinumduman nga Mayo 28, 1898 unang higayon nga giwara ang bandera sa nasud sa engkwentro sa Imus, Cavite kon diin gipildi sa mga rebolusyonaryo ang pwersa sa mga Kastila.
Tuig 1965 usab gideklara ni kanhing presidente Diosdado Macapagal nga ang ika-28 sa Mayo mao ang Nasudnong Adlaw sa Bandera arun handumon ang nahitabo sa Imus, Cavite kaniadtong 1898.
