TACLOBAN CITY – Nagkaabot na an mga kasundaluhan han 82nd Division Reconnaissance Company ha Sinirangan Bisayas tikang ha Marawi City matapos an haros lima ka bulan nga pakig ato ha mga terorista nga grupo nga Maute.
Sul-ot an ira uniporme, kapot nira an ira mga pusil ngan iba nga gamit han maglanding an ira ginsakyan nga C-130 nga eroplano han Philippine Air Force ha DZR Airport. Makikita ha ira mga nawong an kamingaw ha ira mga mahal sa buhay, nakita ha kadam-an nga tawo nga natapo ha ira, namimiling kun may mga pamilyar nga nawong.
Hangkop, harok ngan luha hIn kalipay han makit-an nira an ira mga ginmimingawan.
Sumala han tagapagyakan han 8th Infantry Division nga hi Lt. Cherry Junia, igpapailarom anay ha stress debriefing an mga kasundaluhan durot han ira delikado nga gin-agian ngan maghuhulat hin guidelines para magpaka bakasyon an mga ini.
“Isasailalim muna sila sa stress debriefing hangga’t wala pa kaming natatanggap na guidelines galing sa taas regarding sa bakasyon nila.”
Gagawaran han Armed Forces of the Philippines hin hataas nga morale an mga kasundaluhan nga tikang ha Marawi City.
Nagpatapod naman hi Presidente Rodrigo Duterte nga magbabakasyon an mga sundalo ha Hongkong upod an ira pamilya.
“Ang alam lang namin magbabakasyon sila kasama ang pamilya nila pero hindi namin alam as to how many members of the family.”
Samtang, usa naman nga sundalo an gin uli tikang ha Marawi City nga waray na kinabuhi, ginkilala ini nga hi Sgt. Jadway Suyom taga Sagkahan ha Syudad han Tacloban.
Mayada pa usa ka batallion tikang ha Sinirangan Bisayas amu an 63rd Infantry Batallion an aadto pa yana ha Marawi City ngan ekspektado nga makakauli sunod nga semana.
