Davao City – Nagpatambal sa Southern Philippines Medical Center ang duha ka
helper human bukboka sa usa ka kawatan nga nahitabo sa usa ka subdivision
sa Lanang alas-12:00 sa tungang kagabhion.
Nakaangkon og bun-og sa nagkadaiyang parte lawas si Vilma Galo, 46 anyos
human kulataha sa kawatan samtang nabun-og sab ang nawong ni Rafailes
Nasataya human hapaka sa suspek gamit ang cellphone.
Gisaysay ni Galo nga gisulod sa wala mailang kawatan ang kwarto sa iyang
agalon apan nasanta kini busa siya maoy gigukod sa kawatan.
Nakahimo pa sa pagpangayo og panabang si Galo sa kaubanan niyang katabang
nga si Nasataya pinaagi sa pag-text niini.
Gibukbok sa kawatan si Galo aron mailog ang cellphone nga mukantidad og 10
mil ka pesos ug paspas mikaratil og dagan agi sa pikas nga balay.
Gisuwayan pa og gukod ni Nasataya ang suspek apan gihampak naman hinoon
kini sa nawong sa kawatan gamit ang kinawat nga cellphone.
Maayo na lang kay paspas nakaresponde ang kapulisan sa Sasa resulta nasikop
ang kawatan nga naila nga si Marlon Flores, 35 anyos, dunay kapuyo-puyo, ug
residente ra sab sa naasoy nga dapit.
Kasong robbery ug physical injuries ang atubangon sa dinakpan kinsa
temporaryong gibalhog sa Sasa PNP.
RadyoMaN Joel Viray
