Davao City – Gikinahanglang pasabton gayud og maayo ang mga namuyo sa mga critical areas sama sa mga nag-estar dili lang sa mga baybay apan sa kilid na sa kabaybayunan mismo.
Sa interbyu sa DXDC 621 RMN Davao kang Kinaiyahan Foundation Executive Director Betty Cabasarez, gisugilon niini nga kung masag-ulo gayod sa mga tao ang peligro partikular na sa mga ‘No Build and Habitation Zones,’ dili na angay pa nga pugson silang mubalhin og pinuy-anan.
“Kung istoryahan nato ang safety sa mga tao, dapat sundon nato ang ‘No Build Zones’ kay nagatuo mi nga kanang ingon ana nga palisiya gibase pod nila sa scientific basis ug studies,” matud ni Cabasarez.
Segun ni Cabasarez nga dapat nga irespeto sa publiko kung iimplementar man kini sa gobyerno tungod usab sa dagan sa giatubang nga climate crisis sa kalibutan sama nalang sa hulga dala sa sea level rise.
Usa sa gilantaw niini nga positibo nga epekto kung istriktuhan ang pagpatuman sa ‘No Build Zones’ dili man masulbad gilayon ang problema sa basura apan mamenos-menosan ang mga hugaw nga muadto sa kadagatan gikan sa mga namuyo sa maong mga dapit.
Sumala ni Cabasarez, aron mapuslan ug adunay klarong bili ang mga coastal areas, tamnan gayod kini og mga mangroves kun bakhawan.
“Kadtong mga areas nga dili na mapuy-an sa mga tao, tan-awon kung pwedi matamnan og mga mangroves kay mga mangrove areas man pod na sauna,” segun ni Cabasarez.
RadyoMaN Aimee Guinita
