Davao City – Kasagaran wala magtoo nga mobaha ang Davao River kagabii tungod kay hinay ra ang ulan sa syudad apan sa bukid kusog tungod sa bagyong ‘Vinta’.
Sumala ni Barangay 9-A Barangay Secretary Shiela Neviera, ubay-ubay sa katawhan sa ilang barangay sa San Rafael ang namakwit tungod sa pagdako sa tubig baha sa Davao River sugod sa hapon. Matud niya kasagaran ang wala magtoo nga mobaha.
Giingon ni Neviera, ang kalit nga pagbaha tungod kay naningil na ang kinaiyahan tungod usab sa pagpasagad sa mga tawo diha sa kabukiran usa na niini ang pagkawala sa mga dagkong punoan sa kahoy ug uban pa.
Hinoon matud ni Neviera nakaandam na ang ilang barangay sa pagahimoon sa higayong dunay mahitabong pagbaha, ilabina nga dunay bagyo nga miigo sa Davao region. Giingon pa niya usa sa ilang gihimo mao ang pagpabalhin gilayon sa mga tawo ngadto sa mga luwas nga lugar o evacuation centers.
RadyoMaN Bernard Pantallon
