Davao City – Malaumon ang Center for Political and Democratic Reform Incorporated (CPDRI) nga hingpit mapapas sa poder sa barangay ang incumbent nga mga barangay opisyal nga nalambigit sa iligal nga droga sa taliabot nga piniliay sa barangay ug sangguniang kabataan sa Mayo 14 karong tuiga.
Nanghinaot ang CPDRI Executive Director ug University of the Philippines Political Science Professor Clarita Carlos nga mahinayon na ang Barangay ug SK election aron mawagtang na sa hingpit sa gahum ang mga opisyal nga apil sa pagdula sa droga.
Apan segun ni Professor Carlos, nagdepende gihapon kini tanan sa mga botante nga maoy maghukom sa tanang mudagan sa bugnong lugaynon sa barangay sanglit dili mapugngan ang bisan kinsang buot mupapili lakip na ang mga gidudahang apil sa sindikato sa droga.
Giingon ni Clarita nga dakung hagit karon sa nasudnong kapulisan kung unsaon nila pagsanta sa kadtong mga kandidato nga gadawat og suporta gikan sa mga sindikato sa droga aron dili sila makaapil sa umaabot nga barangay ug sk eleksyon.
Sanglit alang niya, malisod wad-an og katungod ang bisan kinsa nga buot mupapili sa piniliay regardless kun re-electionist ba siya o bag-ong salta sa eleksyon kay mao kana ang isinsiya sa usa ka nasud nga demokrasya.
Ugaling dili gayod mapugngan ang kadtong mga incumbent ug ang baguhang mga kandidato kansang gipaluyohan sa drug syndicate gikan sa pagsalmot sa eleksyon puwede man daw sila pasakaan og kasong administratibo ug kriminal aron matanggal dayon sa katungdanan kung mudaog sila sa piniliay.
Busa hugot ang panghinaut sa professor nga dili na unta ma-oktaba pa ang piniliay ug mahinayon na kini kay mao lamang kini ang bugtong pamaagi aron masilhig ang kasamtangang mga opisyal nga nagpagawong sa sindikato sa droga nga lakip sa listahan ni Pres. Rodrigo Duterte.
RadyoMaN Joel Viray
