Davao City – Murder City o mas nailang killing field in Asia ang gibansag sa Davao City niadtong dekada ‘80 kung asa nagpatigbabaw pa ang balaod militar sa tibuok nasud.
Ang AsiaWeek nga mantalaan nagtandi sa siyudad sa nasud Nicaragua gumikan sa kuyanap nga krimen ug pamatay diin ang Agdao gitawag nga Nicaragdao niadto tungod sa paglungga sa mga kriminal.
Sa Agdao, maghilak ang adlaw nga walay magbuy-od sa nag-unang mga kadalanan niadtong panahona.
Kontrolado sa teroristang CPP-NPA-NDF ang distrito sa Agdao ug ang musupak ug dili musuporta sa kalihukan i-tortured ug silotan sa kamatayon sa Sparrow Unit nga nagkatag sa tibuok dakbayan.
Nakaapekto og dako sa estabilidad sa hapsay ug kalinaw ang pagkatag sa mga NPA sa Agdao busa daghan sa mga negosyante nanglayas ug gi-abandona sa ilang mga establisemento sa Agdao.
Nahugno og maayo ang ekonomiya sa dakbayan ug nabiyaan sa kalamboan ang daghang mga barangay sa siyudad tungod sa paghawa sa mga dagkong mga negosyante nga ginakilkilan sa mga npa.
Gihimong gatasan sa mga NPA ang daghang mga kabos sa siyudad diin ang matag pamilya obligado muhatag og gantang nga bugas ug 50 pesos ug matag semana kini ginakolekta sa mga kobrador sa NPA.
Buot man dili muhatag ang yanong lungsuranon sa pagpangilkil sa mga npa kaniadto apan wala silay mabuhat tungod kung dili sila muhatag silotan man sa kamatayon pinaagi sa Sparrow Unit.
Ang katalawan sa mga Dabawenyo nahulipan sa kaisog ug mialsa sila batok NPA dala na sa ka-abusado sa kalihukan niadto kung asa bisan kinsa i-tsismis nga espiya sa gobyerno ilang patyon.
Kung unsa kakulismaot ang dagway sa Davao City apan karon dako na kaayo og kausaban ug sobra na ka-malamboon sukad subling na-instolar ang hapsay ug kalinaw dinhi sa dakbayan.
Suma ni City Tourism Officer Genrose Tecson nga layo na kaayo gilupad ang Davao City kung ang pagahisgutan kausaban ug kalamboan itandi sa tulo ka dekadang nakalabay.
Kung kaniadto malisang ang mga negosyante sa Davao City apan karon mag-inilugay ang investors sa pag-bubo sa ilang mga negosyo nunot sa na-establisar nga hapsay ug kalinaw sa siyudad karon.
Segun ni Tecson nga mi-angat ang ekonomiya sa dakbayan gumikan sa ambag sa turismo nga naghatag og daghang trabaho ug dakong kinitaan sa siyudad pinaagi sa buhis nga makulekta.
Gisaad sa opisyal nga samtang padayon ang paglambo sa economiya dili matarog ug maguba ang kultura ug naandang praktis sa onse ka tribo dinhi sa dakbayan sa Dabaw.
Ang atong hagit sa bag-ong henerasyon karon mao nga ampingan ug protektahan ang kalinaw ug kalamboan nga gitagamtaman nato karon batok sa mga grupo nga buot mugun-ob niining tanan.
RadyoMaN Joel Viray
