Roxas City, Capiz – Wala makasalbar sa mga kamot sang kawatana ang duha ka mga babaye sa separado nga insidente sang pagpangawat sa sulod sang Gaisano Mall, Arnaldo Blvd. Barangay Tanque, Roxas City kaina sang hapon. Una nga nabiktima diri amo si MELANIE WADDELL Y RAE, 41 anyos, may bana kag isa ka misyonaryo, temporaryo nga nagatenir sa San Antonio Resort, Brgy. Baybay, Roxas City.
Base sa inisyal nga imbestigasyon sang Roxas City PNP, 12:30 kaina sang hapon samtang yara sa escalator ang biktima padulong sa 2nd floor sa nasambit nga mall, wala sini matalupangdan nga may nagbukas sang iya bag kag ginkuha ang iya grey leather nga wallet nga may unod nga master card, points card, Canadian ID sini, drivers license kag cash nga naglab-ot sa P 1,000.
Sa CCTV Footage sang Gaisano Mall, nakita diri nga apat ka mga babaye ang nagbukas sang bag kag nagkuha sang wallet sang biktima. Padayon pa nga gina-identify sang mga kapulisan ang apat ka mga suspek.
Samtang wala man makaluwas sa mga makawat ang isa pa gid ka babaye nga nabiktima sa separado man nga insidente sa sulod gihapon sang nasambit nga mall alas 2:30 sang hapon. Ginkilala man ang biktima nga si CATHERINE POULSEN Y BATUTA, 36 anyos, may bana kag isa ka nursing aid, residente sang Camburanan, Tapaz Capiz.
Nakuha sang mga kawatan ang wallet sang biktima nga isa ka LOUIS VUITTON (LV) nga nagabalor sang P60,000, ATM card, master card, residence card kag Denmark currency nga naga balor sang kapin sa P8,000 pesos. Nagapadayon pa ang imbestigasyon sang mga kapulisan agud matumod ang mga suspek sa duha ka magkasunod nga kaso sang kinawatay sa sulod sang mall.
