Davao City- Gibarogan karon sa usa ka academician sa Dabaw nga daghang mga rason kung nganong nagpanghitabo karon ang insidenteng rape ingon man suicide sa klase klase nga mga pangidaron.
Sa interview karong buntag ni Kasamang June Duterte sa programang Straight to the Point kang Professor Christopher Ryan Maboloc, Assistant Professor in Philosophy sa Ateneo de Davao University , gisaysay niini ang tulo ka mga puntong sosyal nga posibling rason sa mga hitabong rape kon lugos.
Matud pa niya, dunay mga sirkumstansya nga nakamugna sa maong matang sa environment kansa ang tawo ‘prone’ nga maabusohan o mangabuso sa iyang isigkaingon sama sa kakuwang sa oportunidad sa usa ka indibidwal nga mobuhat sa mga meaningful activities; ang reyalidad sa sobrang kapobrehon sa tawo ug ang kakuwang sa environment ilabina ngadto sa mga kabatan-onan nga maglambit kanila sa mga mahinungdanong aktibidad nga mag-edukar ug mopahingkod sa ilang mga panghuna-huna.
Lakip sab ang aspeto sa law enforcement diha sa pag-manage sa kriminalidad kansa mahinungdanon dinhi ang pagtambayayong sa kapulisan ug lokal nga kagamhanan.
Gidugang sa propesor nga angay konsiderahon ang suicide kon paghikog nga dili lamang simple nga hitabo kon dili tinukmod sa depresyon nga angay lantawon nga usa ka mental health problem. Dugang niya nga dinhi gikinahanglan nga mo intervenir ang tanang sector sa katilingban aron mas komprehensibo ang atong aksyon ngadto sa mga buot mag hunos sa ilang kinabuhi.
