Davao City – Angay atubangan sa station manager ug sa news director sa usa ka radio station sa General Santos City ang kasong extortion gipasaka batok kanila sa NBI-12 sa korte.
Nagtoo si KBP Davao City Chapter President Roy Geonson nga adunay lig-on nga ebidinsiya ang NBI-12 aron iduso ang kaso nga robbery and extortion with intimidation batok nila Station Manager Jonathan Macailing ug News Director Salvador Galano.
Suma ni Geonson nga dili magpataka og dasmag ang NBI-12 kung wala dawata sa duha ang lima ka milyon ka pesos nga gikilkil gikan sa reklamo ni Pastor Joel Apolinario kinsa founder sa KAPA Community Ministry International.
Una nang gilimod nila Macailing ug Galano ang pasangil ni Apolinario diin ilang gibarugan nga frame-up ang nahitabong entrapment operation sud sa mall sa Gensan sa miaging adlaw.
Sa kaso sa duha, maglisod matud pa ang Kapisanan ng mga Brodkasters ng Pilipinas sa pagtabang sa duha sa kaso sanglit ang korte lamang ang makadeterminar kun aduna ba’y lama sa kamatuoran ang pasangil batok kanila.
Sa karon, naka-angkon na og temporaryo nga kagawasan ug nakagawas na sa presohan sila Macailing ug Galano human nakabayad og piyansa sa korte di pa lang dugay.
RadyoMaN Joel Viray
