Davao City – Nagtoo ang Kapisanan ng mga Brodkasters ng Pilipinas Davao City Chapter nga wala patya sa gobyerno ang kagawasan sa mga tigbalita.
Suma ni Davao City Chapter President Roy Geonson, ang pagkanselar sa Security Exchange Commission sa Rehistrasyon sa Rappler dili tungod kay buot sa gobyerno nga wad-an og kagawasan ang mga media apan gumikan kadto sa kalapasan sa balaod nga nahimong ugat sa revocation.
Dili kumbinsido si Geonson nga dunay political harassment ang pagpahunong sa operasyon sa Rappler ni dili sab kini motoo nga giipit sa gobyerno ang mao nga news online nga naghatud og taho nga makadaot sa imahe sa kagamhanan.
Walay nakita nga kamatooran ang si Geonson sa pasangil sa mga kritiko nga ubos sa dikta ni Presidente Rodrigo Duterte ang nakab-ot nga hukom sa SEC aron patik-upan ang paghatud og taho ang mao nga kompanya.
Matod pa niya, labaw na nga lisod matuhoan nga subling mibalik ang ispiritu sa diktadoryang rehimen ubos sa administrasyong Duterte sa katarungan nga padayon pa man nakasibya ang mga media outlet bisan pa ang mga kritiko.
Busa walay nakitang gibug aton ang maong opisyal aron mabalaka ang mga tigbalita nga basin patyon sa kasamtangan nga administrasyon ang demokrasya ug kagawasan sa paghatud sa taho.
Nagsumikad ang lakang sa SEC sa pagkanselar sa rehistrasyon sa Rappler human midawat og investment sa duha ka langyaw’ng kumpanya aron mahimong kabahin sa mga stockholder sa mao nga news online nga dakong supak sa balaod sa Pilipinas.
RadyoMaN Joel Viray
