Davao City – Mihimo na og hot pursuit operation ang kapulisan batok sa mga gituohang bandido nga mibanhig sa patrol car sa Kiblawan Police sa Bulolsalo, Kiblawan, Davao del Sur niadtong adlawng Sabado alas 2:30 sa hapon.
Sa report gikan sa Police Regional Office kun PRO XI, samtang nagpatrolya ang kapulisan, gipaulanan matud pa og bala sa gituohang grupo sa mga bandido ubos sa pagdumala ni Manon Ante ang nasangpit nga patrol car nga adunay sakay nga onse ka mga pulis nga gipangunahan ni Police Senior Inspector Erich Von Requilman resulta sa pagkaigo sa ligid sa maong sakyanan.
Dugang niini, nakabalos pa og pagpabuto ang kapulisan apan wala pa masuta og aduna bay napagan sa grupo sa mga bandido.
Human sa insidente, daling misibat ang grupo sa bandido padulong sa bukid nga bahin sa nasangpit nga lugar.
RadyoMaN Renz Barbarona
