Davao City- Gikinahanglan karon ang pagpananum og daghang punoan sa kahoy tungod sa panahon nga nag usab-usab, grabing init sa adlawa ug pagkagabii kusog ang ulan nga moresulta sa mga pagbaha tungod sa pag-apaw sa tubig sa mga kasapaan.
Sumala ni City Environment And Natural Resources Office (CENRO) Chief Engr. Eliza Madrazo, inig human sa pagtanom sa mga kahoy dili pasagdan ug kinahanglang atimanun hangtod nga modako.
Kabahin usab sa mga quarry sites sa syudad, ginatuman sa mga nahingtungdan kung unsay mga patakaran ug kanunay usab silang ginamonitor sa ahensya sa gobyerno. Matud ni Madrazo, gikinahanglan usab ang kooperasyon sa katawhan pinaagi sa pagpahibalo sa gobyerno kung dunay himoong pagpangabuso sa mga kinaiyahan.
Awhag usab ni Madrazo sa mga ahensya sa gobyerno ilabina ang pagmina, kinahanglang tutukan usab kini aron mamonitor ingon man ang taga-barangay nga magpakabana usab tungod kay walay pilion kung ang kinaiyahan na ang masuko.
RadyoMan Bernard Pantallon
