Sa interbyu sa DXDC RMN Davao kang Police Major Michael Uyanguren, Station Commander sa Tugbok PNP, gisaysay niini nga selos ang motibo sa insidente.
Saysay ni Uyanguren nga gikan sa lakaw ang family driver o ang biktimang si alyas Junior, 51-anyos kauban ang iyang among babaye. Pag-abot sa balay, nag-atang na ang iyang among lalaki ug didto na kini gibunalan gamit ang bricks hinungdan nga nakuyapan kini. Wala pa natagbaw ang suspek, giputol usab niini ang kinatawo sa biktima.
Nasayran nga adunay problema sa panghunahuna ang suspek rason nga nabuhat niini ang brutal nga krimen.
“Naa man gud daw history ni nga mura’g naay problema sa pangisip ‘ning suspek. Gani naa gani daw maintenance nga tambal. Unya ang istorya sa asawa na dapat ipa-rehab na siya. Mao ‘to nga nahitabo man ‘tong incident, wala na hinuon siya na-rehab, padulong na hinuon siya sa prisohan,” saysay ni Uyanguren.
Nadala pa sa Southern Philippine Medical Center (SPMC) ang biktima apan namatay ra usab kini pila ka oras pag-abot sa ospital tungod sa kritikal niining kondisyon.
RadyoMaN Kirby Manzon
