Davao City – Dismasyado si Mrs. Juliet Basalan sa Bureau Fire Protection (BFP) ug sa mga rescuers gumikan kay mas gi-una pa kuno ang pagpalong sa kalayo kaysa pagsalba sa 37 ka mga call center agents nga na-trap sa NCCC mall niadtong Sabado sa buntag.
Usa ang anak ni Mrs. Basalan nga si Julius Basalan sa mga call center agents nga gideklara nga missing sa natigayong sunog ug paig na ang lawas niini dihang narekober sa miagi nga adlaw.
Nasakitan og maayo ang ginang kay igo lang daw kuno sila giingnan sa usa sa mga firefighters nga luwas ang kinse ka call center agents sa CR sa mall ug misamot ang ilang kahiubos dihang naghunong ang retrieval operation.
Gisaway sa pamilyang Basalan ang fire drill sa mga rescuers kay magpakitang gilas gyod kun dunay camera apan dili man mabuhat kun sa actual na ug tungod ani nawad-an og pagsalig ang banay sa mga rescuers.
Gikalipay ni Elsie Algabre kinsa iyaan ni Sheila Mae Bacaling usa sa mga call center agents nga namatay sa sunog kabahin sa lakang sa senado, NBI ug DOLE nga mag-imbestiga sa insidente.
Buot ni Algabre nga masuta sa imbestigasyon kun kinsa angay silotan ug patubagon sa kamatayon sa ilang minahal sa kinabuhi gumikan sa kapakyas sa mga rescuers sa pagsalba sa mga biktima.
Kumbinsido si Elsie nga kulang ang fire alarm sa NCCC mall mao nga dihang mi-ulbo ang kalayo sa 3rd floor alas-9:20 sa buntag wala mutingog ang alarm hinungdan wala makabantay ang mga call center agents.
Andam mutambong sa senado ang tibuok banay ugali imbitahan sila sa imbistigasyon aron mahatagan og hustisya ang kamatayon ni Sheila Mae Bacaling nga wala maluwas sa mga rescuers uban sa mga kaubanan niini.
Segun ni BFP-XI Director Kwan Tiu nga ang bugtong kapakyasan lang daw niya mao nga wala niya namandui ang iyang mga sakop sa pagsulod sa naglagiting nga kainit uban sa baga kaayo nga aso sulod sa mall.
Sa post sa Davao Volunteer Fire Brigade nga ilang nasabtan ang negatibo nga kumento sa publiko apan ilang gibarugan nga ilang gibuhat ang tanan aron masalba ang 37 ka call center agents butang nga wala mahitabo.
Matud ni Elsie Algabre nga daghan daw puwede makat-unan gikan sa actual nga panghitabo hilabi na sa kung unsa kaandam ang mga rescuers panahon sa mangilngig nga insidente sama sa sunog sa NCCC mall.
RadyoMaN Joel Viray
