Sirawai, ZDN – Suportado karon sa mga sakop sa Sangguniang Panlalawigan sa Zamboanga del Norte sa temporaryo nga pagpangulo ni Presiding Officer Pro-Tempore Julius C. Napigquit ang gipagawas nga Office Memorandum ni Provincial Schools Division Superintendent Pedro Melchor M. Natividad sa Zamboanga del Norte nga gipunting ngadto ni Public Schools District Supervisor Araceli C Tomboc nga maoy nangulo sa Sirawai District alang sa temporaryo nga pagsuspinde sa pampubliko nga klase sa tanang eskwelahan sa nasangpit nga distrito sugod kaniadtong Lunes, Hunyo 10, 2019.
Diha sa sulat nga gipadala ni Superintendent Pedro Melchor M. Natividad nga pinetshahan ug Hunyo 7, 2019 ngadto ni Governor Roberto Y Uy lakip na ang gipalukip niini nga mga papeles nga legal, gipahibalo niini nga nakahukom siya nga isuspendi ang mga klase sa mga eskwelahan nga nahisakop sa mga barangay sa Guban ug Sipawa sa lungsod sa Siarawai tungod sa matud pa harassment kon pagpanghulga nga nasinati sa mga sakop niini nga mga magtutudlo nga nagserbisyo ug nadestino sa maong mga dapit atol sa adlaw sa eleksyon ug bisan pa paghuman na mismo sa gipahigayon nga 2019 midterm elections kaniadtong Mayo 13, 2019.
Aron sa pagtino sa kamatuoran sa maong taho ug ingon man sa tuyo nga mahusay ang maong sitwasyon diin nahilambigit ang mokabat sa dose (12) ka mga magtutudlo nga nadestino sa DACON Learning Center- Main (kanhi nga Jupiter Elementary School) ug ang DACON Learning Center- Annex (KANHI Sipawa Primary School) nga pulos nahimutang sa Barangay Sipawa ug Barangay Guban, Sirawai ning probinsiya.
Sumala sa giluwatan nga Joint Affidavit nila ni Catherine C. Cabañog, Maria Luz B. Taruc, Lida D. Marcera, Richard P. Jawod, Cheylu P. Narzabal, Anilyn P. Becada, Jackylyn M. Hagonoy, Merly B. Dalan, Mary Grace B. Dalan, Dionesio A. Tuballa, Narciso Bernal ug ingon man sa Affidavit nga giluwatan usab ni Head Teacher Juanito D. Cabañog, Jr., gisaysay nila ang mga pagpanghadlok ug pagpanghulga nga ilang nahiaguman ug nasinati gikan sa mga tinugyanan sa Sirawai Plywood and Lumber Coproration (SPLC) nga ilado sa pangalan sa kompaniya nga DACON nga maoy nagdumala sa mga lugar ug mga barangays nga nahisakop niini.
Gihinganlan sa hiniusa nga Jont Affidavits sa dose (12) ka mga magtutudlo ug sa Affidavit nga giluwatan ni Head Teacher Juanito Cabañog, Jr., sila si Barangay Captain Ernesto De Asis sa Barangay Guban, kinsa maoy Administrative Manager sa SPLC-DACON kauban si Remegio Senit, kinsa usa ka Barangay Konsehal sa Barangay Guban ug kasamtangan usab nga Forestry Supervisor sa SPLC-DACON ug ingon man si Barangay Captain Jessie Napitan sa Barangay Sipawa, kinsa maoy Farm Manager sa Zanorte Palm Rubber Incorporated sa DACON tungod sa matud pa gipanghimo niini nga pagpanghulga sa ilang tagsa-tagsa ka kinabuhi, pagpanghadlok sa propesyon ug trabaho, pagpanginsulto, pagdaug-daug ug pag-ising-ising sa ilang pagpuyo sulod sa Teacher’s Village ug bunk houses nga gitukod sa SPLC-DACON diha sa duha (2) ka barangay.
Diha sa nasangpit nga affidavits nga giluwatan sa mga nangreklamo nga mga magtutudo nasayran nga ang SPLC-DACON nagtukod sa Teacher’s Village ug bunk houses sulod sa Barangays Guban ug Sipawa isip Corporate Social Responsibility (CSR) nga tampo niini aron matabangan ang mga kabataan nga nanagtungha sa duha (2) usab ka eskwelahan nga mao ang DACON Learning Center- Main ug DACON Learning Center- Annex nga matutokan sa pagtudlo sa mga maestra ug mga maestro niini sanglit aduna na man kini kapuy-an sa halayong dapit diin sila madestino.
Apan tungod kay matud pa wala motuman ang mga nangreklamo nga mga magtutudlo sa gipangmando nga ‘illegal election activities’ nila ni Kapitan Ernesto De Asis ug Konsehal Remigio Senit sa Barangay Guban ug Kapitan Jessie Napitan sa Barangay Sipawa mao nga giputlan nila sa kuryente ug tubig ang Teacher’s Village ug lakip ang bunk houses nga gipang-puy-an sa mga magtutudlo.
Sa tuyo unta nga masulbad ug mapangitaan sa tukma nga solusyon kini nga kagubot, giimbitar ni Superintendent Pedro Melchor Natividad sa DepEd ang duha (2) ka kapitan nga gihinganlan sa unahan aron mopahigayon sa usa ka dialogue kaniadtong Hunyo 4, 2019 aron mag-atubang ang duha ka habig apan pakyas ug wala kini mahinayon sanglit wala man motungha ug mopakita sila si Kapitan Ernesto De Asis sa Barangay Guban ug Kapitan Jessie Napitan sa Barangay Sipawa sa lungsod sa Sirawai nga maoy gipunting sa mga reklamo.
Si Board Member Romulo P. Soliva isip Chairman sa Committee on Education and Culture atol sa regular session kaniadtong Lunes, Hunyo 10, 2019, ang mipasupot sa ‘resolution of support’ sa gipagawas nga Memorandum ni Provincial Schools Division Superintendent Pedro Melchor M. Natividad nga nagkanayon, “this office hereby declares the Temporary Suspension of Classes of DACON Learning Center-Main, Sta. Maria Elementary School at Barangay Guban; DACON Learning Center- Sipawa Annex, all of Sirawai, this province, effective Monday, June 10, 2019, until the dialogue/conference between the concerned Barangay Chairmen and all of the teachers of the said schools, to be facilitated by the undersigned (Natividad) here at the Schools Division Office (SDO), Estaka, Dipolog City, shall have been held and a peaceful resolution shall have been reached. For strict compliance.” ‘This representation is surprised, dismayed and with utmost alarm and concerned gives the full trust, confidence and support to Superintendent Pedro Melchor Natividad,’ panapos ni Soliva dungan ang paghangyo nga mahatagan ug mapadalhan ug mga kopya niini ang mga kadagkuan sa Department of Education, Civil Service Commission, Office of the Ombudsman, Department of the Interior and Local Government (DILG) ug mismo si President Rodrigo Roa Duterte. (edith/kapihan)
