Nagahilibi-on si Stephen Teves matapos nabalitaan nga natirohan-patay ang iya abogado nga si Atty. Edel Julio Romero kahapon sa isa ka kalan-an sa Culasi Port, Roxas City.
Suno kay Teves ikaduha pa lang sila ka beses nga nag-hearing kaupod si Atty. Romero matapos nga una ini nagkuha sang serbisyo sang Public Attorneys Office (PAO).
Nagakahangawa si Teves sa mangin dalagan sang iya kaso sa druga nga padayun niya nga ginapanginwala tubtob subong.
Tuig 2016 sang nadakpan sa buy bust operation si Teves nga detain karon sa isa ka jail facility.
Sa pihak sini, nagtukod na sang Investigation Task Force ang mga kapulisan para magtutok sa kaso ni Atty. Romero.
Suno naman kay Police Regional Office 6 Spokesperson Police Supt. Joem Malong, na-identify bilang High Value Target 2 si Romero bangud nga ginakabig ini nga protector, user kag pusher kag rank number 9 sa lista sang PRO 6 sa bilog nga Rehiyon 6.
Si Atty. Romero ang nagserbi nga abogado ni anay PDEA 6 identified Drug Lord Melvin Odicta kag abogado man ini sang drug suspect nga naaresto sa mga anti –drug operation sang kapulisan.
