Davao City – Pagpanglutos ug pagpugong sa paglaum sa mga militante ang gilaraw nga crackdown nga ipatuman ni President Rodrigo Duterte batok sa mga ‘legal fronts’ sa CPP-NPA-NDFP.
Ang bahad ni Duterte nga apil dakpon ang mga militante sa crackdown simbolo sa kamatayon sa katungod ug kagawasan sa pagpadayag sa ilang mga mulo.
Una nang giakusahan ni Pres. Duterte ang mga militante nga supporter, sympathizer ug kakonsabo sa CPP-NPA-NDFP aron pahagsaon ang demokrasya ug ilugon ang gahom sa gobyerno.
Ang bag-uhay nga bahad sa punong-ehekutibo nagpasuko og maayo kang KMP Secretary General Pedro Arnado sanglit sama sa ilang grupo igo lang daw sila nagsinggit sa reporma sa agraryo ug sa katungod.
Wala gitin-aw ni Arnado nga kun aduna ba’y lama sa kamatooran ang akusasyon ni Digong nga apil ang mga militante sa CPP-NPA-NDF sa pagpahagsa sa demokrasya.
Gibarugan sa Secretary General sa maong kapunungan nga dili kabahin sa armadong pakigbisog sa CPP-NPA-NDFP ang mga militante ug nga usa ka dakong bakak ang alegasyon sa president sa punto nga ang mga kumunista wala nagtoo og balaod samtang ang mga militante anaa pa’y pagsalig sa balaod busa walay rason aron ikonektar sila sa kalihukan sa CPP-NPA-NDFP.
Gisupak sa KMP Southern Mindanao Region ang banat ni PDuterte nga sila mga supporters sa CPP-NPA-NDFP.
Gipunting pa niini nga dili buot ingnon nga porke nagsinggit ug nagprotesta sila sa kadalanan mga tigpaluyo na sa CPP-NPA-NDFP.
Inay gidudahan ni Arnado si Duterte nga maoy ‘itoy’ sa Estados Unidos diin dako ang pagtoo sa lider sa hut-ong sa mga mag-uuma nga Amerika ra gihapon ang nagdiktar kang Digong aron i-‘red bait’ ang mga militante.
Hugot nga gipanghimakak ni Arnado ang pamahayag sa 10th Infantry Division Philippine Army nga mikolekta ang mga militante sa minilyon ka pesos nga extortion sa CPP-NPA-NDFP gikan sa mga kompanya nga nag bayad sa ‘revolutionary taxes’ apan alang sa uban extortion activity na.
RadyoMaN Joel Viray
