Pagadian City – Mikabat na sa 13 ang aktibong kaso sa COVID 19 dinhi sa probinsya.
Kini human gikompirmar sa IPHO kagahapong adlawa nga adunay nadugang nga napulo ka LSIs nga nakapahimulos sa Balik Probinsya Program ang nagpositibo.
Ang mga natalang bag-ong kaso sa COVID 19; naglangkob sa usa ka 57 anyos nga babaye ug ang 61 anyos nga lalaki kinsa pulos gikan sa Cebu City ug mga residente sa Tawagan Norte, Labangan. Sakay sa Cokaliong Shipping Lines dunggo ngadto sa pantalan sa Ozamis.
Ang ikatulong nagpositibo mao ang ang 42 anyos nga lalaki nga taga Panagaan, Mahayag nga gikan pa sa KSA. Midangat kini sa Pagadian City airport kaniadtong Hunyo 17.
Ang ikaupat mao ang 38 anyos nga babaye nga taga Limason, Vincenzo Sagun kinsa gikan pa sa Quezon City.
Base sa datos, ang Quezon City mao ang ikaduha sa adunay hilabihan kataas nga natalang kaso sa COVID sunod sa Cebu City. Midangat ang ikaupat nga nagpositibo sa Ozamis Port kaniadtong Hunyo 14.
Ang ikalima nga nagpositibo, usa ka 24 anyos nga lalaki nga taga Balongating, Guipos (ug naggikan sa Pasay City). Midangat sa Pagadian City Airport kaniadtong Hunyo 14.
Samtang ang ikaunom mao ang usa ka 20 anyos nga lalaki taga San Jose, Aurora (gikanToledo City, Cebu). Sakay siya sa Cokaliong Shipping Lines dunggo ngadto sa pantalan sa Ozamis.
Ikapito mao ang 37 anyos nga taga Sto. Nino, Tukuran (gikan gihapon sa Cebu City). Sakay siya sa Cokaliong Shipping Lines dunggo ngadto sa pantalan sa Ozamis kaniadtong Hunyo 14.
Ikawalo: 25 anyos nga lalaki taga Kabuhi, Mahayag ( gikan sa Quezon City). Miabot sa Pagadian City Airport kaniadtong Hunyo 20 sa buntag.
Ikasiyam: 23 anyos nga lalaki taga San Francisco, Tabina (gikan sa Cebu City ug ang ikapulo mao ang 36 anyos nga lalaki taga Don Jose, Dinas (gikan gihapon sa Cebu City)
Sa kinatibuk-an, mikabat na sa 18 ang natalang kompirmadong kaso dinhi sa probinsya, 5 ang naalim na, 3 ang natala kaniadtong niaging semana ug napulo kagahapong adlawa nga kasamtangang nagpaalim pa.
Gipaklaro sa kagamhanang probinsyal nga walay angayng kabalak-an kay kining 13 ka mga aktibong kaso pulos gipahimutang sa Isolation area sa ilang munisipyo samtang ang uban kanila ang anaa sa Isolation Area sa Government Complex sa Dao, Pagadian City.
Hangyo sa kagamhanang probinsyal, sundon ang gimando ug itaho ngadto sa otoridad kon ugaling adunay LSI o ROF nga magsuroy suroy sa ilang dapit.
