Davao City – Gi-angkon ni Magdalo Partylist Rep. Gary Alejano nga adunay awtonomiya ang atong mga kaigsoonang Muslim sa ilang gipakigbisugan kalabutan sa pagduso sa Bangsamoro Basic Law (BBL).
Sumala ni Alejano, gikinahanglan adunay lawom nga pagtuon ang himuon dili lang sa paghatag sa ilang gusto, kon dili tun-an pag usab og maayo kun unsay hustong mga pamaagi.
Sugyot ni Alejano, una kinahanglan adunay komprehensibong pagtuon sa pagpa-implementar sa Republic Act 9054 kun kamugnaan sa Autonomous Region in Muslim Mindanao (ARMM) sa ingon nga paagi aron makita kun unsa ang mga problema ug nganong nakasulti sila nga napakyas ang eksperimento sa maong setup.
Matud pa ni Alejano, walay kasegurohan nga bisan kun hatagan sila og dakong gahum nga mawala na ang panagsumpaki ug posibleng aduna gihapoy mahitabo nga giyera sa rason nga wala magkahiusa ang mga nagkawatak-watak nga mga Bangsamoro groups.
Hagit ni Alejano nga kun seryoso gayud ang mga Bangsamoro fighters, sila maghimo og hustong lakang alang sa pagkab-ot sa malahutayong kalinaw ug progreso sa Mindanao ug sa kinatibuk-ang nasud.
Apan alang kang United States Army Forces in the Far East kun USAFFE President Atty. Elly Pamatong, dili maayo ang pagtunol ug dakung pagsalig ngadto sa mga nakig-away sa estado bisan na ang laraw nga pagtunol ug halapad nga teritoryo ngadto sa Bangsamoro.
RadyoMaN Don Pulayao
