Gibutyag ni LTFRB XI Administrative Officer Engr.Marie Jean Jaralba nga nagkatag ang ilang enforcers karon sa nagkadaiyang mga terminal sa dakbayan partikular sa Davao City Overland Transport Terminal kini subay sa ‘Oplan Semana Santa’ nga nagsugod pa sa katapusang semana sa buwan sa Marso ning kasamtangang tuig.
Segun ni Jaralba nga usa sa katuyoan sa ‘Oplan Semana Santa’ mao ang pagsuta sa kondisyon sa mga bus kon luwas ba o dili i-biyahe ang mga pasahero nga manguli sa ilang tagsa-tagsa ka mga lugar kung asa nila sugaton ang paghinumdom sa kamatayon ni Ginoong Hesus dos mil kapin na ka tuig nakalabay.
Partikular nga ginasuta sa mga Enforcers mao ang makina, mga ligid, mga suga, ug kon dala pod ba ang prangkisa sa mga bus nga magbiyahe sa panahon sa kuwaresma sunod semana.
Matud ni Jaralba, ginasuta usab sa mga enforcers kon relihiyoso bang gituman sa mga driver ug mga konduktor ang ilang mga uniporme kon sila impluwensyado ba sa ilimnong makahubog ug sa droga atol sa ilang pagbiyahe.
Suma ni Jaralba, duna sa’y mga enforcers ang magtakuban nga pasahero aron panid-an ang pamatasan sa mga driver ug mga conduktor ngadto sa ilang mga pasahero ug kon magsubay ba sila o mga palisiya nga gikatakda sa ilang buhatan alang sa mga depasayruan.
Gipaniguro sa opisyal nga mag-atubang og silot ang mga bus companies ug uban pang Public Utility Vehicles (PUV) kon makasupak sila sa “Oplan Semana Santa”.
Pikas bahin, gipamahayag sab ni Jaralba, dunay duha ka bus companies ang nag-aplay og special permit niadtong Marso 17,2023 alang sa 27 ka units nga magdugang og dagan sa entero semana sa kuwaresma sa Abril.
Samtang miapelar ang LTFRB XI ngadto sa riding public nga musakay lang sa mga terminal ug dili daplin sa mga kalsada mag-atang og manakayan tungod ug alang sa ilang kaluwasan gikan sa mga dautang elemento.
RadyoMaN Joel Viray
