TACLOBAN CITY – Dumaop ha RMN Tacloban an konduktor han usa nga pampasahero nga jeep ha Abucay New Bus Terminal nga hi Ranny Advincula nga taga Tolosa, Leyte para magreklamo.
Gin-aaligar ginkastigo daw hiya han tulo nga pulis han Tacloban PNP Station 2 Abucay, ala-una han kulop dida han martes.
Nawad-an daw hin bag an usa nga babaye nga pasahero han mao nga Tolosa-Tacloban Jeep ngan ginsayop hi Advincula nga hiya an kumuha han bag.
Ginreklamo hi Advincula ha PNP Station 2 ngan gin-aaligar gindaop hiya han tulo nga pulis ha Terminal ngan gin-aaligar didto hiya ginpanununtok.
Sumala ha iya, namimiling hiya hin pasaheros hadto nga mga oras ngan gindaop hiya han mga pulis ngan namulospugos hiya kay waray daw hiya sala.
“Namimiling ak hin mga pasaheros kay pila namon adto ngan amu adto ira ako ginkaptan ngan ginbaklid ako. Namulospugos ako kay waray ko man sala, ira ako pupusasan ngan yayabuon ako ngan katapos gin-alsa an akon liog ngada hin diri na ako nakakatamak ha semento ngan nangingitom na ngani ako.”
Dayon nga ginkuha han RMN an pahayag ni PCIsnp. Elmer Jabiñar, Tacloban PNP Station 2 commander, sumala kan Jabiñar, iya ginpakianhan an iya mga kapulisan ngan gindidiwara nira o kun diri tuod nga ginkastigo han mga pulis hi Advincula.
“Pumakiana ako ha akon mga tawo, ira ito gindidiwara nga alegasyon han tagreklamo. An siring nira waray ito nira kastiguha.”
“Ini nga kabutang hano nagcoconduct pa man kita hin imbistigasyon, irerekomendar ini naton ngadto ha diciplenary authority ha TCPO.”
“Diri gad ito maupay kay kun ako mismo nakadi hadto nga oras nga gintutubal hiya di liwat ako masugot kay huna-huna pati ako hito maaalakbatan hiton command responsibility.”
Samtang, ha pinaka-latest nga impormasyon nga nakuha han RMN Tacloban, nagka-aransya na o nagkasarabot na hira Advincula ngan Tacloban PNP Station 2 Abucay ngan diri na magpapasaka hin kaso hi Advincula ngadto ha tulo nga pulis nga gin-aaligar nagkastigo ha iya.
