Iginiit ni House Committee on Public Accounts Chairman at Bicol Saro Party list Representative Terry Ridon na dapat ipagpatuloy ng Independent Commission for Infrastructure (ICI) at Ombudsman ang imbestigasyon sa koneksyon ng mga nagbitiw na opisyal ng gobyerno sa korapsyon sa mga flood control projects.
Sinabi ito ni Ridon makaraang tanggapin ni Pangulong Ferdinand ‘Bongbong’ Marcos Jr., ang pagbibitiw nina Executive Secretary Lucas Bersamin, Budget Secretary Amenah Pangandaman at Undersecretary Adrian Bersamin ng Presidential Legislative Liaison Office.
Diin pa ni Ridon, dapat na silipin din ng ICI at Ombudsman ang testimonya ni dating Department of Public Works and Highways (DPWH) Undersecretary Roberto Bernardo.
Sa sinumpaang pahayag ni Bernardo kaugnay sa flood control scandal ay nabanggit din ang ilan sa mga nagbitiw na opisyal at iba pang executive officials.
