Konsehal giduso ang pagwagtang sa ordinansa sa mandatory facemask

Davao City- Nagduso og ordinansa ang Committee on Health sa konseho diha sa hingpit nga pagwagtang na sa Ordinance No. 0307-20, Series of 2020 kun mandatory nga pagsol-ob og facemasks sa pampublikong lugar dinhi sa syudad.

Gipasabot ni Davao City Second District Councilor ug Comittee on Health chair Richlyn Justol-Baguilod atol sa interbyu sa media nga subay usab kini sa gipakanaog ni President Ferdinand Marcos, Jr. nga Proclamation Number 297 series of 2023 sa pagwagtang na sa state of public emergency sa nasud.

Gibutyag sa konsehal nga kung hingpit na kining mapasar ang pag-repeal sa Mandatory Facemask ordinance mawala na usab ang gahum diha sa pagpanakop ug pagpahamtang og penalties sa mga wala ga-facemasks.

Apan gitin-aw ni Baguilod, kinahanglan gihapong magbayad sa ilahang mga penalties kadtong mga nadakpan ug napasakaan na og kaso kaniadto.

Dugang niini giawhag gihapon niini ang katawhan sa pagsuot og facemask ilabina sa mga estudyante o mga adunay balatian.

RadyoMaN Aimee Guinita