Patay ang usa ka konsehal sa Kapatagan, Lanao del Sur, samtang samaran ang kanhi kapitan sa Poblacion, Balabagan sa nasangpit nga lalawigan, ug laing tulo pa, human sila gipamusil sa mga wala mailang armadong lalaki, udto niadtong Sabado, sa Poblacion, Balabagan, Lanao del Sur.
Giila sa Balabagan Municipal Police Station ang municipal councilor nga si Nassif Palawan Basil, 31 anyos, minyo, samtang ang kanhi barangay chairman nailang si Alvin Abdullah Sampiano.
Ang ubang mga samaran nailang sila si Bibi Disalongan, Topa Disalongan ug Bensuod Mangigin.
Sa imbestigasyon sa kapulisan, ang mga biktima anaa sa panimalay ni kanhi Balabagan Mayor Hadji Amer Sampiano, aron mobisita dihang kalit nga miabot ang mga suspek sakay sa usa ka blue Toyota Tamaraw FX, dayung paulan og bala ngadto sa mga biktima.
Matud pa ni Senior Inspector Jemar Delos Santos, Information officer sa Police Regional Office sa Autonous Region in Muslim Mindanao o PRO ARMM, aduna nay lead ang imbestigador sa mga suspek base sa paghulagway sa mga saksi.
Gitan-aw sa imbestigasyon ang personal nga motibo ug pulitika nga maoy motibo sa pagpamusil.
Padayun ang pursuit operations aron pagsikop sa mga suspek.
(Divina M. Suson)
| | Virus-free. www.avast.com |
