Davao City – Dakung pabor si outgoing First District Councilor Nilo Abellera, Jr. nga wagtangon na sa kadalanan ang mga ‘street barkers’ kun mga dispatchers.
Matud ni Abellera, hasol sa trapiko ang padayong presensya sa mga dispatser ingon man makonsidera nga usaka porma sa ‘extortion’ ang pagpangayo ug kwarta sa mga PUJ drivers nga naga-torno sa kadalanan.
Kahinumdoman nga ang konseho sa Quezon City nipasar og Anti-Barking Ordinance ug Anti-Parking Attendants measure naidtong tuig 2014 aron hiposon ang mga barkers nga nakasamok ug nakahasol sa mga pasahero ug sa kadalanan.
Ang mga masinupakon multahan og P1,500 ug mapreso sulod sa tulo ka bulan sa unang paglapas ug P5,000 ug pagkapreso sa usa ka tuig alang sa ikaduha ug ikatulo nga pagsupak kun offense.
Sa pikas bahin, aron matubag ang mulo sa mga commuters ug sa mga drivers batok sa mga barkers, ang Bacolod City Council nagpasar usab og Anti-Barkers Ordinance ug mao usab ang Iloilo ug Panay.
Gipunto sa mga konsehal sa maong mga siyudad nga ang mga dalan iya kini sa gobyerno ug dili iya sa mga pribado, busa walay katungod ang mga barkers nga mangolekta og bayad gikan sa mga PUJ drivers.
Gikonsiderang extortion ang ginabuhat sa mga dispatchers sanglit ang mga Local Government Units (LGUs) sa maong mga dakbayan wala man magtugot kanila nga sila makalimas og bayad gikan sa mga drivers.
Ang ordinansa sa naasoy nga mga dakbayan nagtin-aw nga ang extortion usaka criminal act kini kun buhat nga dunay tugbang nga silot sa multa hangtud singko mil ug pagkapreso gikan tulo hangtud usa ka tuig.
Kahinumdoman nga gitabangan og kulata sa duha ka dispatchers ang usa ka PUJ driver sa may Bankerohan area human nga P10 lang ang gibayad sa biktima ngadto kanila butang nga ilang gikasuko og maayo.
Dakung pabor si Abellera nga i-ban na ang mga dispatchers dinhi sa dakbayan aron usab malimpyo ang mga dalan sa siyudad gikan sa presensiya sa mga barkers nga nagpasamot sa kaguot sa trapiko sa mga nag-unang kalsada dinhi.
RadyoMaN Joel Viray
