Davao City – Aduna nay nakitang mga alternatibo ang Committee on Environment and Natural Resources sa 19th City Council silbing hulip sa mga single-use plastics sama sa mga plastic nga baso, straw, stirrer, kutsara ug tinidor,plastic bags ug daghan pa.
Gibutyag ni Councilor Diosdado Angelo Mahipus Jr. kinsa chair sa maong komitiba nga aduna nay mga rice straws, kutsara’g tinidor nga ginama sa kawayan ug corn starch ang ilahang nakitang pweding mao nay gamiton sa publiko.
“Ang atoang gitan-aw lang kung comercially available ba ang mga alternatives kay kung muingon ta’g pwedi ta mugamit og dahon sa saging pambalot pero dili man ta isla naa ta sa syudad nga pirteng dakua, so mangutana ta sa mga producers, manufacturers ug distributors sa kadaghanon sa ilahang mahatag nga supply sa syudad sa Davao para dili pod maapektuhan ang atoang trade,” sumala niini.
Segun sa konsehal nga naningkamot sila nga maduso na ang balaudnon kontra single use plastics karong tuiga.
“Naningkamot ta nga mapasar na ni kay atoang ginapaniguro nga ang kinatibuk-an, ang komunidad labi na ang mga business sectors muuyon pod sila ug ang mga environmentalists muuyon pod sila sa atoang pagahimuon,” sumala ni Mahipus.
Gidayeg ni Mahipus ang mga establisyemento nga nag inisyatibong inay cellophanes ang gamitong pambalot, nigamit na kini’g mga paper bags o eco bags silbing alternatibo.
RadyoMaN Aimee Guinita
