Davao City – Apektado ang Davao City Council sa pagkaduhig sa pangalan nila ni Davao City Vice Mayor Paolo Duterte ug 1st District Councilor Nilo “Small” Abellera sa isyu nga giatubang karon sa Bureau of Customs kun BOC.
Sila Pulong ug Abellera ginganlan ni Broker Mark Taguba nga apil sa Davao Group ug gi-alegar nga nagdawatan og suhol gikan sa mga smugglers aron makalusot sa BOC ang ilang mga kontrabandos.
Sumala ni 2nd District Councilor Al Ryan Alejandre, naapektuhan siya lakip ang ubang mga konsehal sa siyudad sa dihang naapil sa sentro sa kontrobersiya sa BOC karon ang bise mayor ug si Abellera.
Apan gitindogan ni Alejandre nga dili siya motoo sa rebelasyon ni Taguba batok sa kaubang konsehal ug kang Duterte.
Pabor ang konsehal nga mas maayo mutambong ang duha ka opisyal sa blue ribbon committee inquiry aron matin-aw ang isyu nga gipahid kanila ug aron malimpyohan ang ilang mga pangalan sa akusasyong kurapsyon sa BOC.
Gibutyag usab ni 2nd District Councilor Diosdado Mahipus nga dili na angay tagdon ang pamahayag ni Taguba sanglit siya mismo niangkon nga wala siya’y personal nga kasayuran busa makonsidera kini nga pure hearsay lamang.
Sigun ni Mahipus tataw nga ‘scripted’ lamang ang tanan ug adunay bulok- pamulitika ang pagduhig kang Paolo Duterte ug Abellera apan ang tinood nga target sa isyu sa BOC mao gihapon si Pangulong Rodrigo Duterte.
Subay niini, nagpadayag og suporta ang lokal nga mga magbabalaod sa dakbayan ngadto sa bise mayor ug kang Abellera sa ilang giatubang nga pagsulay karon bunga sa kontrobersiya sa P6.4B kantidad sa shabu nga nakalusot sa BOC gikan sa nasud sa China.
Kasamang Joel Viray
