Roxas City, Capiz- Indi kuntento si Tiza Punong Barangay Alfredo Menong Albaladejo sa natabo nga dayalogo sa tunga sang provincial government kag council sang amo nga barangay sang nakaligad lang nga adlaw.
Suno kay Albaladejo nga mismo si Provincial Legal Council Atty. Ronnie Dadivas ang nagpahayag nga natug-an na sang provincial government sa Civil Service Commission ang kontrobersiyal nga lote. Indi naman maintindihan ni Albaladejo kon ngaa gintug-an ini sang probinsya nga wala pa ma-settle ang matuod nga status sini.
Matigdas man ang pahayag ni Albaldejo nga ginapakigbato gid lamang niya ang propidad nga ginbilin sang iya utod nga anay punong barangay man sang amo nga lugar.
Ginpahayag dugang sang kapitan nga magakunsolta anay ini sa iya mga constituent may kaangut sa kontrobersiyal nga lote nga nahamtangan sang senior citizens office kag day care center.
Ginpunto man sini nga dapat ang boses sang mga pomuluyo ang magpangibabaw.
Sa amo nga dayalogo, ginaproponer sang liderato ni Governor Tony del Rosario amo nga temporayo anay nga saylohon ang senior citizens office sa barangay hall kon sa diin igapahamtang naman ang divider.
