Davao City – Gibutyag ni City Social Welfare and Development Office (CSWDO) head Julie Dayaday nga naka-schedule na ang pakig-koordinar sa buhatan uban sa Department of Social Welfare and Development (DSWD) ug sa Provincial Social Welfare sa Davao del Norte, apil na ang ubang LGU sa rehiyon, alang sa mas gipahugtan nga kampanya batok pagpangayo og limos sa kadalanan sa Davao City.
Matud pa ni Dayaday, sulod sa pipila ka tuig milabay, ginahatod na sa LGU ang hinabang o pinaskohan ngadto sa kabukiran nga bahin sa dakbayan.
Sa maong paagi, dili na kinahanglan nga mulugsong sa syudad ang atong mga kaigsuonan nga Indigenous People (IP), aron malikayan ang disgrasya o bisan unsang kakulian sa kalsada.
Hinuon, naandan na kini sa mga IP sa dakbayan, busa dili na makita nga nagalatagaw sa kadalanan. Apan sa miaging tuig, adunay gihapon nga namatikdan nga presensya sa syudad. Base sa gilusad nga profiling, kini naggikan sa kasikbit nga mga lugar sama sa Talaingod, Kapalong, ug Sta. Cruz, lakip na ang ubang bahin sa probinsya sa Bukidnon ug Cotabato.
RadyoMaN Kareen Beltran
Facebook Comments
