Davao City – Karong adlawa Nobyembre 1 maoy naandang gitawag nga ‘Todos Los Santos’ (All Saints Day) samtang ang Nobyembre 2 mao ang Adlaw sa mga Minatay (All Souls Day) nga gina-komemorar nato matag tuig aron paghinumdum sa atong mga kabanay nga nitaliwan na ngadto sa laing kalibutan.
Sumala ni Msgr.Paul Cuizon sa Simbahang Romano Katoliko, kini nahimo nang kultura sa mga Pilipino nga maghinumdum aron dalitan sa mga pag-ampo ang atong mga minahal sa kinabuhi nga mitaliwan na sa laing kalibutan pinaagi sa pagduaw kanila diha sa mga sementeryo diin sila gipahiluna.
Apan gipasabot ni Cuizon nga kini nga okasyon wala lamang nagtumong aron i-selebrar ang maong adlaw kon dili lakip usab ang panagtapok-tapok, paglipay-lipay pinaagi sa salo-salo o pagpahigayon ug mga party o magbakasyon aron maglingaw-lingaw kauban ang mga higala ug miyembro sa pamilya.
Matud ni Cuizon, angayang hinumduman sa katawhan nga meintras gihandom nato ang adlaw sa mga minatay, dili mawala ang atong mga Christian values sama sa pagtoo sa kasagrado sa kalag sa tawo ug sa gahum sa Diyos labaw sa nga tanan.
Sa pikas bahin, gibarugan karon sa usaka religious organization officer nga walay igong rason aron kita magpahigayon ug Halloween Parties tungod kay usa kini ka dakung insulto ngadto sa Diyos sanglit daw gitudloan nato ang mga tawo sa pagsupak sa mga kasugoan sa Kahitas-an.
Sumala ni Jude Dela Cruz, Yeshiva Pirchei Shoshanim director, dili angayang motambong sa maong mga aktibidad gumikan kay dayag kini nga nakasupak sa kabubut-on sa Labaw’ng Makagagahum ug sa atong Manulunda.
Alayon niini, nanawagan karon si Dela Cruz sa katawhan nga likayan kining mga butanga, ilhon ug sabton kung unsay nakasulat diha sa Bibliya aron maoy atong gamitong hustong giya diha sa matarong nga pagkinabuhi ug binuhatan ug dili ang pagsalmot na hinoon niining mga Halloween Parties nga nagpromotar na hinoon sa gahum sa dautan.
Kahinumdoman nga bag-ohay pa lamang, 17 ka mga Overseas Filipino Workers (OFWs) didto sa Kingdom of Saudi Arabia arestado gumikan sa pagsalmot sa usaka Halloween Party nga gikonsidera sa maong Middle Eastern state nga usaka matang sa ‘forbidden act’ sama sa witchcraft.
RadyoMaN Bernard Pantallon
