Davao City – Adunay posibilidad nga sniper ang nihimo sa pagpatay sa magtiayong Atty. Sitti Gilda Mahinay-Sapie ug Muhaimain Sapie sulod mismo sa subdivision nga ilang gipuy-an sa Barangay Talomo ning syudad sa Davao pasado alas 5:00 sa hapon niadtong Hunyo 14, 2021, adlawng Miyerkules.
Sa interbyu sa DXDC RMN Davao gibutyag ni Davao City Police Office City Director Police Col. Kirby John Kraft, gisusi pa sa Regional Crime Laboratory Office 11, ang tulo ka mga deformed slugs (balines) nga narekober aron mahibaw-an ang kalibre sa armas nga gigamit sa suspek.
Gihulat pa usab ang resulta sa awtopsiya aron makompirma ang mga gun shot wounds sa mga biktima.
“ Inaantay natin iyong autopsy result kasi doon natin mababase kung saan tinamaan ang mag-asawa talaga, with that mababasa natin kung professional ba ito base doon sa tama nila, pangawala kung anong kalibre ang ginamit kung high powered maaring long rifle ito o short lang na baril ba ito na ganoon kalayo,” sumala niini.
Posibleng aduna kiniy halong personal grudge tungod kay gipaniguro gayod sa nipusil nga pareho ang magasawa ang mapuruhan.
Wala lung-i sa mga imbestigador ang pagpangita sa empty shells (basiyo) sa bala atol sa ilang pagback-track aron masayran kung asa nagpabuto o nipwesto ang gunman.
Giimbestigahan sa kapulisan ang isyu sa mga biktima sa land dispute ug giingong bikil tali sa kampo sa abogada ug Board of Directors sa Home Owners Association sa gipuy-an nilang subdivision diin nahitabo ang krimen. Giestudyuhan sa mga imbestigador ang cctv footage nga nakapwesto sa balay sa mga biktima.
Samtang, gibutyag ni Kraft nga walay gipakitang log book o rekord man lang, ang mga gwardiya sa mga sakyanan o mga indibidwal nga nisulod sa subdivision nga maoy sumbanan alang sa pagpatuman sa hugot nga seguridad.
RadyoMaN Aimee Guinita
