Davao City – Dako gihapon ang pagsalig sa katawhan sa kapulisan luyo sa ilang mga kapalpakan nga nahimo sama na lamang sa insidente sa Mandaluyong.
Giingon ni kanhi police ug karon acting director sa Philippine Drug Enforcement Agency (PDEA-XI) Antonio Rivera, usa lamang ka isolated case ang nahitabo ug dili rason nga mawala na ang pagsalig sa katawhan sa pamunoan sa Philippine National Police (PNP).
Gipasabot usab ni Rivera isip kanhi police, ensakto ang gihimong pagresponde sa kapolisan sa Mandaluyong apan mali ang impormasyon nga ilang nadawat tungod kay dili kini mao ang mga suspect.
Giingon ni Rivera gigamit lamang sa mga pulis ang ilang ‘common sense’ sa pagtubag sa maong insidente.
Giklaro pa usab ni Rivera nga angayan lamang nga suportahan ni PNP Director General Ronald Dela Rosa ang maong mga pulis isip lider apan wala nagpasabot nga iyang depensahan.
Bugtong gihimo lamang sa PNP chief mao ang pagsuporta kanila sa himoon unyang imbestigasyon apan kung mapamatud-an nga adunay kasaypanan ang mga pulis, ipahamtang ang silot nga walay pagdapig isip pagdisiplina.
RadyoMaN Bernard Pantallon
